पोखरा, पोखरा महानगरपालिकाको वडा नं ११ र १५ ले १४ औं संस्करणको अन्तर्राष्ट्रिय सफल पोखरा म्याराथनलाई सफल बनाउन आ–आफ्नो तयारी सहित प्रतिबद्धता समेत जनाएका छन् ।
भुतपूर्व खेलाडी मञ्च पोखराको आयोजनामा यही फागुनको ३ गते पोखरामा हुने म्याराथनका लागि उक्त म्याराथनमा सक्रिय सहभागिता जनाउने प्रतिबद्धता जनाएका हुन् ।
ति वडाका वडाध्यक्षहरुले म्याराथनका दिन वडाभित्रका टोलविकास संस्था लगायतका सामाजिक संघसंस्था, स्थानीय आमा समूह र क्लबहरुलाई परिचालन गर्ने प्रतिबद्धता समेत जनाए ।
पोखरा महानगरपालिका वडा नं १५ का वडाध्यक्ष प्रकाश पौडेलले आफ्नो वडाको तर्फबाट पोखरा म्याराथनलाई पूर्ण रुपले सहयोग गर्ने बताए । उनले वडाका जनप्रतिनिधि लगायत सामाजिक संघसंस्था, टोलविकास संस्था, स्थानीय आमा समूह र क्लबहरुलाई पूर्ण रुपले परिचलन गर्ने बताए ।
‘पोखरा, गण्डकी प्रदेशको साथसाथै पर्यटनको समेत राजधानी हो,’ वडाध्यक्ष पौडेलले भने, ‘नेपाल भ्रमण वर्ष २०२० को अवसरमा हुन लागेको म्याराथनले पोखराको खेलकुद पर्यटनमा समेत सघाउ पु¥याउँछ । पोखरा खेलकुदको हब समेत हो । म्याराथनले पोखरालाई चिनाउँछ । पोखराकै सबैभन्दा ठूलो खेलकुद इभेन्ट पोखरा म्याराथनलाई वडाको तर्फबाट सक्दो सहयोग पु¥याउनेछौं ।’
रेन्बो चिल्ड्रेन होमका सहायक प्रिन्सिपल खेमनारायण ढकालले म्याराथनमा सहभागी वडावासीका लागि आयोजकको व्यवस्थापनमा कमी हुन नहुने बताए । म्याराथन रुटको दायाँवायाँ स्वागतका लागि बसेकाहरुलाई म्याराथनको समाप्तिको सूचना लगायत आयोजकले धन्यवाद दिनुपर्नेमा ढकालले जोड दिए ।
पोखरा महानगरपालिका वडा नं ११ का जनप्रतिनिधिले समेत पोखरा म्याराथनलाई सफल पार्न विविध कार्यक्रम गर्ने प्रतिबद्धता जनाए । वडा नं ११ भित्रका टोलविकास संस्था लगायत सामाजिक संघसंस्था, स्थानीय आमा समूह र क्लबहरुले म्याराथन धावकको स्वागतका लागि सक्रिय रहने जनाए ।
धावकहरुको स्वागतका लागि रुटको दायाँवायाँ जलको कलश र घडासहित संस्थाको नामसहित जनचेतनामूलक नारा लेखिएको ब्यानरसहित म्याराथनमा सक्रिय सहभागिता जनाउने उनीहरुको प्रतिबद्धता थियो ।
भुतपूर्व खेलाडी मञ्च पोखरासँगको कार्यक्रममा उक्त वडाका वडा सदस्यहरु जंगबहादुर हमाल ठकुरी, मीनबहादुर गुरुङ, तीर्थकुमारी गुरुङ, टुकरा परियार जनप्रतिनिधि तथा टोलविकास संस्था, सामाजिक संघसंस्था, स्थानीय आमा समूह र क्लबका अध्यक्ष पदाधिकारी र सदस्यहरुको सहभागिता थियो ।
यस पटकको पोखरा म्याराथनलाई खेलकुदमार्फत विश्वमा शान्ति फैलाउन सकिन्छ भन्ने मान्यतालाई समेत उपयोग गरिदैंछ । यसै संस्करणको पोखरा म्याराथनमा ‘शान्तिका लागि दौड’ मा १३ देशका १७ जना विदेशी धावकहरुले विश्वमा शान्ति फैलाउने उद्देश्यले दौडने भएका छन् ।
उनीहरुले पिस रनको टर्च सहित दौडने शान्तिका लागि दौडका नेपाल संंयोजक श्वेता प्रधानले बताइन् । प्रधानका अनुसार विश्वको १ सय ५० भन्दा बढि देशमा विश्व शान्तिका लागि पिस रन टर्च बालि सकेको उल्लेख गरिन् ।
नेपालमा सन १९९४, १९९८ र २०१८ को वर्षहरुमा पिस रन टर्चको प्रदर्शन गरिएको प्रधानको भनाई थियो । प्रधानले भनिन्, ‘पोखरामा सन २०१८ को पोखरा म्याराथनमा पिस रन टर्चलाई पहिलो पटक प्रदर्शन गरिएको थियो । त्यसपछि, यस संस्करणको म्याराथनमा उक्त पिस रन टर्र्च पोखरा आउनेछ ।
पोखरा । नेपाल ओलोम्पिक कमिटीका अध्यक्ष तथा प्रतिनिधी सभा सदस्य जिवनराम श्रेष्ठले पोखरा म्याराथनले राष्ट्रिय तथा अन्तर्राष्ट्रिय क्षेत्रमा राम्रो सन्देश प्रवाह गरेको बताएका छन ।
यहि फागुन ३ गते पोखरामा आयोजना हुने ‘पोखरा अन्तर्राष्ट्रिय म्याराथन–२०२०’ लाई सफल बनाउन पोखराका विभिन्न संघ, संस्था तथा सांसदहरुका विच आयोजित भेटघाट कार्यक्रममा अध्यक्ष श्रेष्ठले उक्त कुरा बताएका हुन । राज्यलाई संमृद्धितर्फ लैजान खेलकुदको आवश्यकता रहेको बताउँदै पोखरा म्याराथन खेलकुद पर्यटनसँग पनि जोडिएकोले अन्तर्राष्ट्रिय स्तरमा राम्रो सन्देश प्रवाह गरेको उनले बताए ।
विश्वभर म्याराथनको महत्व बढिरहेको अवस्थामा राष्ट्रले गर्व गर्ने लायक खेलकुदको ईभेन्ट पोखरामा हुनु सुखद रहेको बताउँदै अध्यक्ष श्रेष्ठले भने–“म्याराथन खेलकुद क्षेत्रको मात्र हो भन्ने सोचाई हटाउदै सबै क्षेत्रका व्यक्तिलाई अपनत्व महसुस गराउन सक्नुपर्छ ।”
त्यसैगरि अन्तरक्रियामा राष्ट्रिय खेलकुद परिषद्का उपाध्यक्ष पिताम्बर तिमिल्सिनाले पोखराको खेलकुद क्षेत्रलाई माथी उठाउन आफु सधै लागिपरेको बताए । त्यस्तै गण्डकी प्रदेशका सांसद राजिव पहारी र दिपक कोईरालाले पोखरा म्याराथन प्रदेशकै गौरवको खेलकुद भएकाले साथ र सहयोग रहने प्रतिवद्धता व्यक्त गरे ।
अन्तरक्रियामा मञ्चका अध्यक्ष तेज गुरुङले पोखरा अन्तर्राष्ट्रिय म्याराथनको विगतका गतिविधि र अव हुने म्याराथनका बारेमा प्रकाश पारेका थिए । शान्ति र स्वास्थ्यका लागि खेलकुद भन्दै पर्यटन प्रवद्र्धनमा ठुलो भुमिका पोखरा म्याराथनले खेलिरहेको उनको तर्क थियो । यसपालिको म्याराथनको विश्व शान्ति सद्भाव दौडमा सहभागि हुन युनेष्कोका पूर्व अध्यक्ष डेभिड्सन लिन्कोनसहितको टोली आउने उनले जानकारी दिए ।
१४ औं सस्करणको पोखरा म्याराथनमा ‘वर्ल्ड पिस रन’ का धेरै सदस्यहरुले पोखरा म्याराथनलाई शान्तीका लागि दौडका रुपमा उपयोग गर्ने आयोजकले बताएको छ । यस अभियानका लागि १३ देशका २७ भन्दा वढीको सहभागिता रहने अन्तरक्रियामा बताईयो ।
पोखरालाई म्याराथन शहरको रुपमा विश्वमा परिचित गराउन तथा विदेशी धावकहरुलाई आकर्षित गर्न पुरुस्कारको राशीमा वृद्धी गरिएको छ । जसमा यस पटक ४२.१९५ किमीको पोखरा म्याराथनमा प्रथम हुनेलाई २ लाख नगद प्रदान गर्ने जनाएको छ । त्यसै गरि दोश्रो र तेश्रो हुनेलाई क्रमश नगद १ लाख र ७५ हजार प्रदान गरिने छ भने भने चौथो हुनेलाई नगद १५ हजार प्रदान गरिने छ ।
प्रथम हुनेलाई भुतपुर्व खेलाडी मञ्चको अन्तर्राष्ट्रिय सहयोगी संस्था पोखरेली मञ्च यूकेले यहि अप्रिल २०२० मा हुने बेलायतको कुनै एक म्याराथनमा सहभागि गराउने समेत घोषणा गरेको छ ।
पोखरा म्याराथन १० किलोमिटर महिला–पुरुष, ५ किलोमिटर छात्र–छात्रा, ह्विल चियर र दृष्टीविहिनका लागि दौडलाई निरन्तरता दिइएकोछ । १० किलोमिटर तर्फको दौडमा प्रथम, द्वितिय र तृतिय हुनेलाई क्रमश नगद १५, १० र ५ हजार र ५ किलोमिटर तर्फ १०, ५ र ४ हजार प्रदान गरिनेछ । महिला–पुरुष ह्विल चियर र दृष्टीविहिन दौडका लागि समेत ५, ३ र २ हजार प्रदान गरिने मंचले जनाएको छ । पोखरा म्याराथनमा कूल २८ जना धावकहरुलाई पुरस्कृत गरिने छ ।
मंचले यस पटक प्रविधिलाई उपयोग गर्दै खेलाडी दर्ता समेत अनलाइनबाट गर्ने जनाएको छ । पोखरा म्याराथनको www.pokharamarathon.org अनलाइन र मोवाइल एप्स बाट समेत खेलाडीले सहभागिताका लागि नाम दर्ता गर्न सक्नेछन् ।
